Hinke Dijkhuizen – 
Van der Kaap (1933-2025)
Hinke is geboren ien Moarum, opgruid ien Nuus en loater ien Nijbert terecht kommen, woar ze met heur man Berend een garage en tractorbedrief runde. Veural ien dit kleine gebied is Hinke bekend worden, ze schreef over heur jeugd en over wat ze om heur toe zag. De kastanjebomen die ien blui stoan met heur keerskes vier rechtop as veurbode van n nij seizoen. En Mien dörpke een ode aan Nijbert met as leste regel ‘Nijbert, wat hol ik van dij’. Et gedicht Ons pa zien handen woar dankboarheid en liefde veur heur pa uutsprekt, is wat mij betreft ok n ode aan e handen van Hinke. Die handen die zo lang ien t Westerkwartiers schreven hemmen en ok heur veurdrachten woarien ze de woorden met ons deelde. Je kinnen rusteg stellen dat er gien verenging of kerk ien en rond Nijbert is woar ze niet veurdroagen het. Altied met n soort stategheid en n humoristische ondertoon.
Alie de Vries
Volledeg terecht eerbetoon aan Hinke. Veur mij was zij een boegbeeld van onze Westerkwartierder schrieverij. Ien e joarlekse bijeenkomsten ien Zuudhörn ien verband met e Schriefwedstried was ze steevast één van de vaste deelnimmers, en ondanks heur joarenlange verdiensten veur de schrieverij ien heur eigen Westerkwartier was ze nog aal net zo enthousiast asof et heur eerste keer was dat ze met dee, super relaxed en vrolek ien ale bescheidenheid. Ik bin dankboar veur ale gesprekken die wij met nkander over zo veul joaren had hemmen.